تحدہ عرب امارات نے مغربی کنارے اور مقبوضہ مشرقی یروشلم میں تقریباً 3500 نئے آباد کاری یونٹس کی تعمیر کی منظوری دینے کے اسرائیلی حکومت کے فیصلے کی شدید مذمت کی۔ اس کے ساتھ اس نے مقبوضہ فلسطینی سرزمین میں موجودہ تاریخی اور قانونی صورتحال کو تبدیل کرنے کے تمام اقدامات کو یکسر مسترد کیا ہے۔
اپنے ایک بیان میں وزارت خارجہ نے متحدہ عرب امارات کی جانب سے بین الاقوامی قانونی قراردادوں کی خلاف ورزی کرنے والے تمام طریقوں کو دوٹوک طور پر مسترد کرنے کی تصدیق کی۔ جس سے خطے میں مزید کشیدگی اور تناؤ کا خطرہ ہے نیز جن کی وجہ سے امن و استحکام کے حصول کی کوششوں میں رکاوٹ کھڑی ہورہی ہے۔
وزارت نے مشرق وسطیٰ میں امن کے عمل کو آگے بڑھانے کے لیے تمام علاقائی اور بین الاقوامی کوششوں کی حمایت کرنے کے ساتھ ساتھ ان غیر قانونی طریقوں کو ختم کرنے کی ضرورت پر زور دیا جو دو ریاستی حل اور ایک آزاد فلسطینی ریاست کے قیام کے لیے خطرہ ہیں۔ دریں اثناء اس نے اس بات کا بھی اعادہ کیا کہ متحدہ عرب امارات امن، انصاف کے فروغ نیز دوست فلسطینی عوام کے حقوق کا ادراک کرنے کے اپنے عزم پر ثابت قدم ہے۔
وزارت نے عالمی برادری سے مطالبہ کیا کہ وہ مزید جانی نقصان کو روکنے، مقبوضہ فلسطینی علاقے میں صورت حال کو مزید بھڑکانے سے بچنے، اور جامع اور منصفانہ امن کے حصول کے لیے تمام کوششوں کو آگے بڑھانے کے لیے فوری جنگ بندی تک پہنچنے کی کوشش کرے۔
